R.Viviani

Bella,
zitta, tu nun ll'hê 'a dí
ch''ammore tujo sóngh'i'...
Sottavoce torna a giurá
ca nun mm'hê maje 'a lassá...
Nun fidarte, nun fá capí
ch''ammore tujo sóngh'i'...

Damme 'a vocca pe' te vasá...
Saccio 'e vase ca mme saje dá:
Vase cianciuse
ca 'e musse 'nfuse
ce fanno fá...
Troppo fucuse,
luonghe e azzeccuse
pe' c''e scurdá...
ah...ah...
Cu 'a stanza ô scuro,
chin''e paura,
senza sciatá...
Comme a chi arrobba,
tremmanno, c'îmm''a vasá...

Bella,
ll'ommo ca sta cu te,
è tanto amico a me...
Si lle faccio 'sta 'nfamitá,
è pecché saje vasá...
Stu segreto ha da rummané
tra tutt'e duje, Carmè'...

Damme 'a vocca pe' te vasá...
stammo sule...mo mm''e ppuó' dá:
Vase cianciuse
ca 'e musse 'nfuse
ce fanno fá...
Date annascuso,
cu 'e pporte 'nchiuse,
senza scuccá...
ah...ah...
Sti vase forte
ca sulo 'a morte
cancellarrá,
sóngo,'e st'ammore,
tutt''a felicitá!