'O nnammurato mio dorme cu 'a sposa...
Isso 'a pigliaje pe' zetelluccia 'e casa!
E va dicenno: "Chella vocca 'e rosa,
sultanto a mme mm'ha dato 'o primmo vaso!"

E pe' nce fá accapí qual è ll'errore,
e pe nce fá accapí chi è 'sta mugliera...
mm'aggio purtato appriesso: 'o cusetore,
'o nepote d''a chianchéra,
'o garzone d''o trattore...

ch''a sanno meglio d'isso e meglio 'e me!

'O 'nnammurato mio, pe' fá 'o sbruffone,
figlianno 'a sposa, ha fatto nu festino...
E che t'ha fatto nèh...cantante, suone,
balle e sciacquitte, na nuttata sana!

E pe' nce fá accapí qual è ll'errore,
e pe' nce fá accapí chi è 'sta mugliera...
mm'aggio purtato appriesso: 'o 'nzagnatore,
'o figliasto d''a capèra,
Papiluccio 'o cantatore...

ca ognuno 'e lloro tène che cuntá!

E mo nce voglio dí: "Mio caro amico,
tu tienatille amice a chist'amice
e nun t''e 'nnimicá, chesto te dico,
ca ognuno 'e lloro te pò fá felice!

Anze, si vuò' fá 'a vita d''o signore,
e vuò' vedé cuntenta 'sta mugliera,
tu miéttete d'accordo cu 'o sartore,
cu 'o nepote d''a chianchèra,
cu 'o garzone d''o trattore...

ca nisciun'ommo è cchiù cuntento 'e te!"