SCUMMUNICATO

Fiore - Nardella

T'arricuorde? T'aspettavo
dint''a cchiesa d''o Gesù:
tu trasive e i' suspiravo...
suspirave pure tu...
Po' venive e, leggia leggia,
t'assettave a fianco a me
ca tenevo sempe 'a seggia
priparata giá pe' te!

Mme dicive: "Vita mia!
prega e dice appriesso a me..."
e i' dicevo
e i' dicevo: "Avemmaria"
"Gloriapate" appriesso a te!

Te spiavo sottavoce:
"Mme vuó' bene sempe a me?"
Rispunnive: "Fatt''a croce...
voglio bene sempe a te!"
Ma stu munno comm'è tristo!
Chi puteva 'mmagginá
ca, 'int''a casa 'e Gesù Cristo,
mme venive a repassá?!

Mme dicive: "Vita mia!

Io mo só' scummunicato
e, int''a cchiesa d''o Gesù,
da che tu mm'hê abbandunato,
nun ce traso proprio cchiù!
Ma tu no! Si' sempe 'a stessa...
Tu si' sempe chella llá
ca te siente ancora 'a messa
pe' fá ancora 'nfamitá!...

Ca si mo nun só' cchiù io,
certo n'ato aspettarrá...
Primma 'o 'mpare,
primma 'o 'mpare 'e ccose 'e Dio...
Doppo, 'o 'mpare a ghiastemmá!