RUSELLA 'E MAGGIO

Trusiano - Cannio

Quanno staje fore a 'sta loggia,
sott'a stu bellu grillaggio,
fresca, accussí, leggia leggia,
si' na rusélla 'e maggio.
Si è triste, 'o cielo, se schiara,
cchiù prufumate só' 'e sciure,
ll'aucielle cantano a coro
mentr'io suspiro:

Rusélla 'e maggio mia,
rusélla 'e maggio...
Tu si' caduta 'a cielo 'ncopp'a 'sta loggia...
Te vasa 'nfronte 'o sole cu 'o meglio raggio...
Rusélla 'e maggio mia,
rusélla 'e maggio!

Quanno po' cuse io mme 'ncanto:
sti mmane toje tengo mente...
Pare che 'a sott'a sti punte,
proprio nu sciore sponta!
Tanno, 'a te voglio na cosa:
pe' mme fá jí 'mparaviso:
ca nu ricamo cianciuso
mme faje cu 'e vase...

Rusélla 'e maggio mia,
rusélla 'e maggio...
....................

E si cantá po' te fanno,
'o viento passa e, sentenno,
comm'a na radio, p''o munno,
'sta bella voce spanne...
Corre p''e monte e p''o mare
e, doce, va p'ògne core,
purtanno gioje e suspire
d''a primmavera...

Rusélla 'e maggio mia,
rusélla 'e maggio...
....................