POVERA SANTA

Bonagura - Cioffi

Fiore amaranto,
stu core cantava cuntento:
"'A voglio bene e mme vò' bene tanto!"
Giá steva pronta 'a casa:
'na casarella rosa...
giá te vedevo, oje bella,
dint''a cchiesa...

vestuta 'a sposa.

Pecché te ne si' ghiuta...
pecché te ne si' ghiuta?
Ah, scellarata!

Da quanno mm'hê lassato,
chist'uocchie nun reposano na vota!

Ched è na vota!

Frunnélla 'e rosa,
mo chiagne cu ll'uocchie annascuse,
'sta vicchiarella mia, ca nun reposa...
E pe' mme fá cuntento,
quanta buscíe mme conta!
Nun ne diceva maje,
povera santa...

e mo mm''e cconta!

Pecché te ne si' ghiuta...
pecché te ne si' ghiuta?
Ah, scellarata!

Da quanno mm'hê lassato,
'sta freva nun mme lassa maje na vota!

Manco na vota!

Fiore turchino,
io saccio ca viene dimane...
'o ppenzo, 'o ssaccio ca dimane viene!
E' nu presentimento
ca mme fa bene tanto...
Ma...che malincunia
si 'o sole sponta...

inutilmente!

Pecché te ne si' ghiuta...
pecché te ne si' ghiuta?...
Ah, scellarata...

Si tuorne nu minuto,
chist'uocchie s'arreposano na vota,

ll'ùrdema vota...

.........................................................
Povera vecchia mia, povera santa!...