E' chisto 'o popolo,
cchiù ardente 'e Napule,
sott''o Vesuvio
'e casa sta...
'O ffuoco 'o ssente
pe' dint''e vvene...
quanno vò' bene,
nn''o puó' stutá!

Popolo vesuviano,
pe' me tu si' 'o popolo
'o cchiù napulitano...
'E San Giuseppe,
'e Somma,
'e Uttajano...
só' tutte brava gente:
'e meglie paisane!
'O ffuoco d''o Vesuvio
te 'nfiamma, t'accalora...
e quanno faje 'ammore,
Ah...
overo saje amá!

E nun fa scrupole
'sta vocca 'e fravula:
quanno mme vasa
mme fa sunná...
Sape fá 'ammore
in eruzione...
che 'spressione
chiena 'e buntá...

Popolo vesuviano,
pe me tu si' 'o popolo
'o cchiù napulitano...
'A San Giuseppe,
'a Somma,
'a Uttajano...
te vene 'o vino buono,
'o vino paisano...
'O ffuoco d''o Vesuvio
te 'nfiamma, t'accalora
e quanno faje 'ammore,
overo saje amá...

Gelosa è 'a femmena
ma è cu ragione...
e nun perdona
si, pe' chisà,
quacchedun'ato
ll'arrobba 'ammore...
tanno lle vólle
te puó' scuttá...

Popolo Vesuviano,
pe' me, tu si' 'o popolo
'o cchiù napulitano...
'e San giuseppe,
'e Somma,
'e Uttajano...
só' tutte belle 'e nnénne,
só' bone e paisane...
'O ffuoco d''o Vesuvio,
te 'nfiamma, t'accalora...
e, quanno faje 'ammore,
overo saje amá...