Capaldo - Gambardella

Mo ca vinticinch'anne aggio cumpito,
cchiù 'e nu migliaro 'e lire mm'è trasuto...
Cu chesta grossa somma ch'aggi'avuto,
na nénna aggi''a truvá comme dich'i'...

Mme voglio jí a 'nzurá 'nterra Surriento..
mme voglio jí a pigliá na Surrentina!
Nun mme ne curo ca nun tene niente:
basta ca tène 'e mmuzzarelle fine!

Ma bona, bella e fina,
na guappa Surrentina!

E si 'sta furastera mme tradisce
pecché nun sóngo prátteco 'e paese?
Primma ca faccio chesti mmale spese,
Napulitana mia, te voglio a te!

Mme voglio jí a 'nzurá dint''a Duchesca...
mme voglio jí a pigliá na pizzajola...
Nun 'mporta ca nun è na cosa fresca
basta ch''a sape fá cu 'a pummarola!

Na bella pizzajola,
ch''a fa cu 'a pummarola!

Ma n'ata cosa mo stó' riflettenno:
cu chella d''a Duchesca 'un se pazzéa
chella se magna 'e llire e mme paléa!...
'A veritá...mme voglio alluntaná!

Mme voglio jí a 'nzurá 'ncopp'Antignano...
mme voglio jí a pigliá na ciardenèra!
Nun 'mporta ca mme chiammano pacchiano,
basta ch'arracqua 'o ciardeniello â sera...

Senza mancá na sera,
'nzieme cu 'a ciardenèra!...

E cu 'sta ciardenèra manco è cosa
pecché só' tutte quante male spine...
Ne fanno ca ne fanno 'int''e ciardine...
E ll'unica risorsa è chesta ccá:

Mme voglio jí a 'nzurá a Santa Lucia...
mme voglio jí a pigliá na Luciana!
Padrona 'a faccio 'e tutt''a rrobba mia,
basta ca tène 'e mmummarèlle sane!

Na bona Luciana,
cu 'e mmummarèlle sane!...