MANNAME NU RAGGIO 'E SOLE

Titomanlio - Benedetto

'Spatria nu core sempe cu ragione
o pe' ll'ammore o pe' cercá furtuna...
senza sapé ca, 'nterr'a na banchina,
lassanno 'o bbene,
se lassa 'a vita...
e lassa 'a vita chi perde a te!...

Mánname nu raggio 'e sole dint'a na lettera,
nu raggio 'e sole...
nu poco 'e sole
mme fa sentí ll'ammore!...
Pássano pure pe' ccá sti vvoce 'e Napule...
però na voce,
mme mette 'ncroce:
mme sta cantanno "Anema e core..."
Mm'affogo dint''e llacreme cchiù amare...
só' lacreme cucente tutt''e ssere...
A Napule se canta e i' mme ne moro
luntano 'a te...
Mánname nu raggio 'e sole dint'a na lettera,
nu raggio 'e sole,
nu poco 'e sole...
che te pò custá?

Femmena bella, e dilla na buscía!...
Puó' dá nu juorno 'e vita â vita mia...
Famme penzá ca nun mme lasse maje...
E dimme ancora ca mme vuó' bene
e ca vuó' bene sultanto a me...
..................................................
..................................................

Mánname nu raggio 'e sole dint'a na lettera...
Nu raggio 'e sole,
nu poco 'e sole...
che te pò custá?!...