LARIULA'

Di Giacomo - Costa

(Duetto)
Lui: - Frutto 'e granato mio, frutto 'e granato,
quanto t'aggio stimato a tiempo antico!
Tiénete 'o muccaturo arricamato,
tutta 'sta rrobba mia t''a benedico...

Lei: - Quanto si' bello e quanto si' curtese!
io t'ero indifferente e mo se vede;
tècchete 'o muccaturo 'e seta ingrese...
fossero accise ll'uommene e chi 'e ccrede!

Insieme: - Fossero accise ll'uommene ('e ffemmene)
e chi 'e ccrede!...


Ah, lariulá,
lariu - lariu - lariulá...
Ll'ammore s'è addurmuto
nun 'o pòzzo cchiù scetá...

Ah, lariulá,
lariu - lariu - lariulá...
Ll'ammore s'è addurmuto
nun 'o pòzzo cchiù scetá...

Lui: - E quanno è chesto, siente che te dico:
Io faccio 'ammore cu na farenara;
tène nu magazzino 'int'a nu vico,
ll'uocchie ca tène só' na cosa rara...

Lei: - E quanno è chesto: Io pure faccio 'ammore
e a n'atu ninno mo tengo 'o penziero...
s'erano date a fuoco ánema e core:
mme só' raccummannata a nu pumpiere...

Insieme: - Mme só' raccumannata/o a nu pumpiere...

Ah, lariulá
.................

Lui: - Ah, vocca rossa comm'a nu granato!
Chi 'o ssape 'o tiempo antico si è fernuto?...
Chello ch'è certo è ch'io stó' frasturnato,
e 'o sapore d''o ppane aggio perduto!

Lei: - Si' stato sempe bello e 'ntussecuso,
e pure, siente, vide che te dico,
nun mme ne 'mporta ca si' furiuso:
voglio campá cu te, murí cu tico!...

Insieme: - Voglio campá cu te murí cu tico!...

Ah, lariulá
................