HANN' 'A TURNA'

Capaldo - Feola

Oggigiorno, tutt''e viecchie,
fanno 'e scicche e 'e zerbinotte;
se capisce, dato il tempo...
fanno lloro,
fanno lloro 'e giuvinotte...

Chi te pizzeca p''a strata,
chi te dice 'a parulella,
chi te manna na 'mmasciata...
tutto chesto, nèh, pecché?
Pecché manca 'a giuventù!

Hann''a turná
sti surdatielle nuoste!
Tanno vulimmo fá na bella festa...
Dicimmo: "Unò - dué...
oje surdatiello mio,
ménate 'mbracci'a me!..."

Nu vicchiotto canta e, attuorno,
ll'ati viecchie fanno 'o coro:
luna, ammore e serenate,
só' fernute,
só' fernute 'mmano a lloro!

E se tégnono 'e capille
sopracciglie e mustaccielle
pe' paré cchiù piccerille
ma 'nsustanza ch'hann''a fá?!
si lle manca 'a giuventù?!

Hann''a turná
sti surdatielle nuoste!
...................................

'Ncopp''o bagno, stammatina,
se presenta nu vavóne
e mme dice: "Se volete,
profittate,
profittate 'e ll'occasione!"

Vicchiarié', va' te refunne!
Vicchiarié', ménate a mare!
E' venuta 'a fin''o munno
cu nu viecchio 'e chisti ccá,
senza fuoco 'e giuventù...

Hann''a turná
sti surdatielle nuoste!
..................................