(Nun voglio fá niente)


Che sole, che sole,
che sole cucente!

E chi vò' fá niente?
E chi pò fá niente?!

Che bella canzone
ca sona 'o pianino...
Mo 'nzerr''o barcone
pe' nun 'a sentí...

Che bella figliola
ca passa p''o vico...
Mo 'a chiammo e lle dico:
"Volete salí!?"

No, no,...cu stu sole,
stu sole cucente,
nun voglio fá niente...
Nun voglio fá niente!

Ma, dint''a cuntrora,
che caldo se sente!...

E chi vò' fá niente?
E chi pò fá niente?!

Mo piglio, mme spoglio,
mme 'nfilo 'int''o lietto,
mme leggo nu foglio,
mme metto a fumá...

Ma 'a cámmera 'e lietto
sta troppo luntano...
Cchiù meglio 'o divano:
Nu passo e stó' llá!...

Ma, dint''a cuntrora,
che caldo se sente!...
Nun voglio fá niente!...
Nun voglio fá niente!

Che luna, che luna,
che luna lucente!

E chi vò' fá niente?
E chi pò fá niente?...

Mo arrivo â Turretta,
po' torno p''a villa...
Va buó', nun dá retta
mme scoccio 'e vestí...

Che bella canzone
tenevo p''e mmane...
mo veco, dimane,
si 'a pòzzo ferní...

Pecché cu 'sta luna,
'sta luna lucente,
nun voglio fá niente...
Nun voglio fá niente!