E' PICCERELLA

Bovio - Valente

'A mamma ha ditto: "Oje ni', saje che te dico?
E' strappatella e nun capisce ancora...
te tratta, ch'aggi''a di', comm'a n'amico...
meglio 'e n'amico: comm'a frate e sora...

E' piccerella,
è n'anema 'nnucente
e nun capisce niente..."

E' piccerella e intanto,
saccio sul'io chello ca dice 'a gente...
Ma 'a mamma dice ch'è na piccerella...
e i' dico appriess'â mamma: "E' piccerella!"

"E ll'hê purtato 'a veste?.." "E sissignore!
- Na veste 'e seta.- E chiste só' 'e scarpine...
Chist'è 'o cappiello - ch'è venuto 'a fore,
rrobba 'e Parigge, - e chiste só' 'e ricchine..."

E 'a mmamma dice:
"Mo pare cchiù bella,
povera piccerella..."

E' piccerella e intanto,
saccio sul'io chello ca dice 'a gente...
Ma 'a mamma dice ch'è na piccerella...
e i' dico appriess'â mamma: "E' piccerella!"

Ma che ato vò'...nun è cuntenta ancora?
Che mm'aggi''a levá cchiù?!...Scuorno a 'sta faccia!
Marcia alla moda, spènne, fa 'a signora...
e a mamma mia, nemmeno na petaccia!

E i' zitto, caccio sempe...
E tanno è bello,
quanno caccio 'o curtiello!

E' piccerella e intanto,
saccio sul'io chello ca dice 'a gente...
Ma 'a mamma dice ancora: "E' piccerella!"
E i' dico appriesso â mamma: "E' piccerella!"