CHIAPPARIELLO

Palomba - Bruni

Hanno arrestato, a ll'angolo 'e Furía,
nu muzzunciello 'e diece, dudece anne
pecché ha fatto nu scippo, 'mmiez'â via,
mentre doje guardie stévano passanno...
A vedé stu guaglione ch'è tantillo,
lle scappa quase a risa a 'o brigadiere...
dice: "Comme te chiamme?" "Chiappariello!"
"E papá tujo che fa?" "Sta 'int''e cantiere..."

Chiappariello, Chiappariello,
guagliunciello piccerillo...
nun è uno, ma só' mille
comm'a isso, a 'sta cittá...
Chi è cchiù 'nzisto 'e tutt''e figlie,
è chi ajuta giá 'a famiglia
ca ll'aspetta...ma, na sera,
nun 'o vede cchiù 'e turná...
nun 'o vede cchiù 'e turná...

E na mamma, 'mmiez'a tante,
pe' chist'atu dispiacere...
chiagne sotto 'e Filangiere
chiagne sotto 'e Filangiere...

E mo sta sempe triste Chiappariello...
nun ride maje, nun dice na parola...
Pare nu viecchio stu carceratiello:
lègge 'o giurnale e nun è ghiuto â scola...
'A notte penza â mamma e penza ê frate,
penza ca nun vò' fá cchiù cose 'e male,
pe' nun addeventá comm'a chist'ate,
ca giá só' delinquente abituale...

Chiappariello, Chiappariello,
................................................

Sti mariuncielle sguígliano a migliara
e 'a polizia nun pò fá quase niente...
"Pe' 'mmiez'â via nun stamme cchiù sicure...
è na piaga, è nu scuorno!..." dice 'a gente...
Sóngo nu scuorno, sí, pe' tutte quante
ca nun lle damme 'o studio o n'arte ê mmane...
ca, forse, nun sarríano malamente,
si 'a societá lle desse nu dimane...

Chiappariello, Chiappariello,
...............................................