CANZONE 'E TERZIGNO

Agostino Palomba - Luigi Bifulco

('A vennegna)

Dinto settembre, 'o mese cchiù sanguegno,
bello è stu manto d'oro d''a campagna:
'o pergulato mio, cárreco 'e pigne
d'uva ammatura d'ácene russagne,
quase mme chiamma: s'ha da fá 'a vennegna!

Viene cu me,
statte cu me,
dint''a campagna
te voglio tené...
A faticá
t'aggi''a purtá...
po', dint''a vigna,
te voglio vasá!

A pigne a pigne, ll'uva 'int''o canisto,
cade tagliata da sti mmane noste;
tu dice: "E' tarde, jammuncenne basta!"
Io nun só' stanco ancora e dico: "Resta!...
N'atu vasillo, dimme, che te costa?"

E i' vaso a te,
tu vase a me,
chesta vennegna
ce fa stravedé...
Ce fa 'ncantá,
ce fa sunná...
tramonta 'o sole,
ma nuje stammo ccá...

N'anno è passato e mo è turnato 'o mese
che 'a vigna è chiena 'e piénnule zucuse...
Fatico i' sulo: tu rummane â casa
cu nu criaturo a pietto 'e quatto mise...
Tiempo 'e vennegna...ma che bella cosa!

Terzigno ohé,
ringrazio a te
si na famiglia
mme trovo cu me!!!
Mme faje campá,
mme faje sunná...
'Ntiempo 'e vennegna
mme metto a cantá...