CANTA ABBRILE

E. A. Mario

E se ne véne Abbrile alleramente:
vène cantanno pe' scetá ll'amante...
Dice: "Buongiorno, oj' femmene custante!
Chi bene vò' ca s''o ttenesse a mente:
Ammore,'e core 'e vvò' doce e aprilante!"

Bella, e si canta Abbrile
canta pe' chi vò' bene:
tu, nun appena vène,
cuntenta e 'nnammurata,
fatte truvá affacciata...

E' Abbrile!...E' Abbrile!...

E canta Abbrile cu na voce d'oro
ll'ariette ca fernesceno a suspire...
E tu, ca mo te spícceche e te 'mmire,
siente st'aucielle ca lle fanno 'o coro,
siente 'o prufumo 'e st'aria ca respire...

Bella, e si canta Abbrile,
tutto fiurisce attuorno...
Dice ll'ammore: "Io torno
pe' fá cchiù allère 'e ccase,
pe' fá cchiù ardente 'e vase..."

E' abbrile!...E' Abbrile!...

Viene cu me, ca te port'io, p''a mano,
p''a strada 'a dó', cantanno, Abbrile vène...
e ce fermammo addó', 'mmiez'ê vverbene,
ce sta n'angolo a 'o ffrisco, 'o cchiù stramano:
ce vede abbrile, e canta, e se 'ntrattene...

Bella, e addó' canta Abbrile,
certo te faje cchiù doce:
Parle e te tremma 'a voce...
vase e t'addora 'o sciato...
E' doce ogne peccato!

E' Abbrile!...E' Abbrile!...