BELLAVISTA

Fiore - Donnarumma


Veníteme a truvá, stó' a Bellavista...
tengo na bella casa bene esposta:
doje logge, tre balcune, tre feneste,
na tavula 'e mangiá pe' vinte poste...
Veníteme a truvá stó' a Bellavista.

Vuje purtate duje spaghette,
quacche poco d'antipasto,
seje galline, tre caprette,
na canesta cu 'e pullaste...
Nu bicchiere 'e vino buono
nun mm''avit''a fá mancá...
ch'io ve canto na canzone
ca ve faccio cunzulá!...

Veníteme a truvá stó' tanto triste
surtanto ll'aria bona nun mm'abbasta...
Io voglio stá cu 'amice sempe 'nfesta...
(nun ve scurdate 'a cesta cu 'e pullaste...)
Veníteme a truvá stó' a Bellavista...

Vuje purtate un po' di pesce:
treglie, spigole e aragoste...
e si po' nun ve rincresce,
frutta, strega, birre e paste...
Se vi capita un prosciutto
mme ll'avit''a fá vedé...
ricurdateve 'o paccotto
chino 'e zuccaro e cafè...

Veníteme a truvá stó' a Bellavista,
io tengo appena diece figlie e basta...
só' piezz''e core ma só' troppo 'nziste...
nu regaluccio a testa che ve costa?
Venítele a truvá a sti cammurriste...

Vuje purtate duje bracciale,
tre rilorge, e tre catene...
n'automobile a Pascale,
nu curredo a Filumena...
E pe' fá na cosa meglio,
na pelliccia pure a me...
nu brillante per mia moglie
di carati trentatré...


Finale:

Ricurdateve 'e spaghette
con il poco di antipasto,
'e ggalline, 'e tre caprette,
'a canesta cu 'e pullaste;
e 'o barile 'e vino buono
nun mm''avit''a fá mancá...
ch'io ve canto na canzone
ca ve faccio cunzulá!...