ADDIO PULECENELLA!

Agostino Palomba - Luigi Bifulco


Mme canuscite? Só' Pulecenella...
só' n'ombra janca e torno 'mmiez'â folla:
Mme voglio arricurdà d''e tiempe belle,
'e quanno se faceva 'o tira-e-molla
p'avé nu vaso 'a quacche Palummella!...

Pulecenè' ma tu,
saje ca Napule s'è cagnata
e 'sta rrobba nun se fa cchiù?!

Mo sische e, llà pe' llà,
tiene 'mbraccio tre piccerelle
bell'e pronte a se fà vasà!

Mme voglio arricurdà stu bellu mare,
addó', cu Palummella, jévo a fà 'ammore...
pe' dint'a ll'onne, 'e lluce d''e llampare,
parevano matasse 'e stelle d'oro,
piscate, 'a cielo, 'a mille marenare...

Pulecenè' ma tu,
saje ca Napule s'è cagnata
e 'sta rrobba nun se fa cchiù?!

Mo invece, a mare, va
sulo quacche contrabbandiere
cu 'o prublema ch'ha da campà...


Vuje che dicite? Comme mme dispiace!
'A gente d'ogge nun è cchiù felice...
Napule bella, t'hanno miso 'ncroce!...
Mo che ce faccio ccà? Salute amice...
Io mme ne torno addó' stó' 'nsanta pace...

Oje luna, luna, lù',
te saluta Pulecenella:
'ncopp''a Terra nun torna cchiù...

Oje luna, luna, lù',
ll'ombra janca 'e Pulecenella,
cu te saglie p''o cielo blu...