| ACCUSSI' |
'O mare e 'o viento chiagnono, stanotte,
dint'a stu golfo...
Ricorde e ombre tornano, stanotte,
dint'a stu core...
Ah, quanto pagarría nu poco 'e suonno!...
nu poco 'e suonno ca mme parla 'e te...
...E 'o suonno vene e mme trascina 'nfunno,
comm'a na varca a mare, senza rimme...
Accussí...accussí...
si' turnata, n'ata vota,
'nnammurata, 'mbracci'a me...
Sti viuline, a Margellina,
mo suspirano pe' te,
'nziem'a me...
T'accarezzo comme fusse tu na mamma...
doce doce comme fusse na Madonna...
na Madonna tu pe' me...
Accussí...accussí...
nun parlá, nun dirme niente
ca stu core vò' sentí
sulo 'o mare, sulo 'o viento
abbracciato 'nziem'a te...
Accussí...accussí...
S'addorme 'a luna e sta schiaranno juorno
pe' tutt''o golfo...
Io 'nzerro ll'uocchie e dico:
"Nun è ghiuorno pe' chistu core..."
Saccio ch'è na buscía, ma voglio 'o suonno...
sultanto 'o suonno ca te porta a me...
. . . . . . . . . . . . . . . . . . . . . . . . . . . . . . . . . . . .
...E 'o suonno vène e mme trascina 'nfunno,
comm'a na varca a mare, senza rimme...
. . . . . . . . . . . . . . . . . . . . . . . . . . . . . . . . . . . .
Accussí...accussí...
si' turnata, n'ata vota,
'nnammurata 'mbracci'a me...
................................................
